Любоў – гэта маё жаданне зрабіць жыццё дарам для іншых. Выражаецца яно ў канкрэтных дзеяннях і высілках. Пачаткам жа з’яўляецца Божая любоў да мяне. Магу занурацца ў яе, разважаючы ахвяру Езуса.
Езус сказаў Нікадэму: Ніхто не ўзышоў на неба, акрамя таго, хто сышоў з неба, Сына Чалавечага. І як Майсей узвысіў змяю ў пустыні, так павінен быць узвышаны Сын Чалавечы, каб кожны, хто верыць у Яго меў жыццё вечнае. Бо так палюбіў Бог свет, што аддаў Сына свайго Адзінароднага, каб кожны, хто верыць у Яго, не загінуў, але меў жыццё вечнае. Бо не паслаў Бог Сына свайго ў свет, каб судзіць свет, але каб свет быў збаўлены праз Яго.
Пытанне пра значэнне крыжа – адно з найважнейшых у хрысціянскай веры. Да выявы крыжа лёгка прызвычаіцца, бо магу бачыць яго штодня дома і ў касцёле. У чым ён праяўляецца ў маім жыцці? Хрыстос кажа, што няма большай любові за тую, калі хто жыццё аддае за сваіх сяброў. На крыжы Бог паказаў, як моцна любіць мяне. Гэта знак любові, якая не ведае межаў!
Таксама крыж з’яўляецца знакам цяжару чалавечага граху, а значыць і майго. Гэты цяжар кладзецца на мяне і на людзей побач. Часам яго наступствы бачу адразу, часам яны бываюць не заўважальныя на першы погляд.
Яшчэ крыж – гэта знак перамогі і надзеі. Як прыгожа пісаў св. Аўгустын: «Глядзі на крыж. Любі Укрыжаванага! Заўсёды насі крыжык з сабою! Калі ўпадзеш – ён падыме цябе! Калі ты будзеш плакаць, ён будзе тваім суцяшэннем і дасць упэўненасць. Хочаш ведаць, колькі вартая твая душа? Узглянь на крыж!»
Папа Францішак зазначыў, што крыж з’яўляецца цаной сапраўднай любові. Для некаторых ён можа быць проста сімвалам культуры, упрыгожваннем, завушніцай ці татуіроўкай. Што крыж значыць для мяне? Ці я бачу ў ім выраз любові Бога да мяне?
Езус сказаў сваім вучням: «Калі хто хоча пайсці за Мною, няхай адрачэцца ад сябе, возьме крыж свой і ідзе за Мною» (Мц 16, 24). Праз Хрыста прымаю ўласны крыж і праз яго адкрываюся Хрысту. Ці гатовы я прымаць адказнасць за штодзённыя абавязкі – асабістыя, сямейныя, грамадскія? Ці веру, што Бог дае мне патрэбныя сілы?
Гледзячы на маё жыццё, магу заўважаць толькі негатыўныя моманты і мець уражанне, быццам углядаюся ў цемру. Магу бачыць сябе грэшнікам, слабым, няўдачнікам, у якога мала што атрымліваецца. Свята Узвышэння Святога Крыжа кажа мяне скіраваць позірк на крыж, які аздараўляе ад атруты цемры. Езус з яго гаворыць мне: «Тваё жыццё мае сэнс». Сёння я магу папрасіць Бога адкрыць маё сэрца на гэтую праўду.
кс. Алег Шпець SChr
