Пакліканне вучняў канкрэтнае: Хрыстус дакладна акрэслівае, куды яны павінны ісці і што рабіць. Ён удзяляе Дванаццаці ўладу над «нячыстымі духамі», бо гэтыя духі не толькі брудныя самі па сабе, але падбухторваюць людзей да брудных думак, слоў і ўчынкаў. Разам з магчымасцю лячыць хваробы і немач такая ўлада – вялікая сіла, здольная змяніць жыцці многіх людзей.

Часцей за астатніх згадваецца ў Пісанні каларытная фігура апостала Сымона Пятра. Езус праз многія ласкі і ўплыў ператварае гэтага даволі няўстойлівага чалавека ў свайго надзейнага сведку, пра што сведчыць і ягонае імя «Пётр», што на грэчаскай мове абазначае «скала».

Хрыстус стварыў са звычайных, слабых і грэшных людзей, моцную і ўплывовую супольнасць, якая стала не толькі годнай сувяззю з мінулым Ізраэля, але і трывалым падмуркам для будучыні Касцёла.

Ці ўсведамляю я, што таксама з'яўляюся вучнем Хрыста і нясу адказнасць за пашырэнне Евангелля ў свеце?

Касцёл – гэта перадусім супольнасць, і маё жыццё і паводзіны пэўным чынам сведчаць пра яе моц ці слабасць. Якім бы я хацеў бачыць Касцёл? Як я магу да гэтага спрычыніцца?

Пане, дзякую Табе за магчымасць быць часткай Твайго Касцёла. Бясконца захапляюся тым, як Ты штодня гартуеш і збіраеш у адно самых розных людзей. Прашу, адары мяне патрэбнымі ласкамі, каб я штодня быў годным сведкам Добрай Весткі.